ଏଣିକି କ୍ଷୀର, ଜୁସ ପ୍ୟାକେଟ ଭଳି ମିଳିବ ମଦ

 ଏଣିକି କ୍ଷୀର, ଜୁସ ପ୍ୟାକେଟ ଭଳି ମିଳିବ ମଦ

ଭୁବନେଶ୍ୱର,୨୧/୨ (ଓଡ଼ିଶା ଆଦର୍ଶ) : ଏଣିକି କ୍ଷୀର, ଜୁସ ପ୍ୟାକେଟ ଭଳି ମିଳିବ ମଦ ! ୧୮୦ ଏମଏଲ ବା ନିବ୍ ଏବେ ମୋଟା କାଗଜ ପ୍ୟାକେଟରେ ଆସିବ। କାଚ ବୋତଲରେ ମଦ ବିକ୍ରି ଉପରେ ଲାଗିପାରେ କଟକଣା। ବିଧାନସଭାରେ ଏସଂପର୍କିତ ଅବକାରୀ ମନ୍ତ୍ରୀଙ୍କ ଲିଖୂତ ଉତ୍ତରରୁ ସାମ୍ନାକୁ ଆସିଛି ସରକାରଙ୍କ ଏଭଳି ବଡ଼ ନିଷ୍ପଭିର ସୁରାକ୍। ରାଜ୍ୟରେ ଠିପିଖୋଲା ଓ ଠିପି ବନ୍ଦ ମଦ କାଚ ବୋତଲରେ ବିକ୍ରି କାରଣରୁ ପରବର୍ତ୍ତୀ ସମୟରେ ଏହା ଅଘଟଣର କାରଣ ସାଜୁଥିବା ଦର୍ଶାଇ ଏହାର ବିକଳ୍ପ ବ୍ୟବସ୍ଥା ସମ୍ପର୍କରେ ସରକାରଙ୍କ ପଦକ୍ଷେପ ଜାଣିବାକୁ ଚାହିଁଥିଲେ ବିଧାୟକ ସନା ମହାକୁଡ଼। ଯାହାର ଉତ୍ତରରେ ଅବକାରୀ ମନ୍ତ୍ରୀ ଦର୍ଶାଇଛନ୍ତି ଅବକାରୀ ନୀତି ଅନୁସାରେ କାଚ ବୋତଲ ପରିବର୍ଭେ ଟେଟ୍ରା ପ୍ୟାକ୍ ବ୍ୟବହାରକୁ ଅନୁମତି ଦିଆଯାଇଛି। ଯାହା ପରିବେଶ ସୁରକ୍ଷା ପାଇଁ ମଧ୍ଯ ଅନୁକୂଳ । ଏହା ସହିତ ପରିବେଶ ସୁରକ୍ଷା ଦୃଷ୍ଟିରୁ ସରକାର କାଚ ବୋତଲର ରିସାଇଲିଂ ପାଇଁ ବି ଉତ୍ସାହିତ କରୁଥିବା ଉତ୍ତରରେ ଦର୍ଶାଯାଇଛି। ତେବେ ନୂଆ ଅବକାରୀ ନୀତିରେ ଏନେଇ ସ୍ପଷ୍ଟତା ଆସିବ ବୋଲି ଅବକାରୀ ମନ୍ତ୍ରୀ କହିଛନ୍ତି ।

ତେବେ କ'ଣ ଏହି ଟେଟ୍ରା ପ୍ୟାକ ? ବିଶେଷକରି ମୋଟା ପେପର, ଆଲୁମିନିୟମ ଫଏଲ, ପଲିଥିନ ଭଳି ତିନିଟି କାଟେଗୋରିରେ ଆସୁଛି ପ୍ୟାକ । ଏହାର ଫାଇଦା ହେଉଛି, ସହଜରେ ବ୍ରେକେଜ ହେବ ନାହିଁ। ଲୋକେ ରେଡି ଟୁ ଡ୍ରିଙ୍କ ସୁବିଧା ପାଇବେ, ଏଥିସହ ହାଲୁକା ବି ହେବ।ମହାରାଷ୍ଟ୍ର, କର୍ଣାଟକ ପରେ ଓଡ଼ିଶାଏହି ପଦକ୍ଷେପ ନେବାକୁ ଯାଉଛି। ତେବେ ମଦ ବ୍ୟବସାୟୀଙ୍କ କହିବା କଥା ଟେଟ୍ରା ପ୍ୟାକ୍ ସହଜରେ ନଷ୍ଟ ହେଉ ନଥୁବାରୁ ଏହା ସେତେଟା ପରିବେଶ ଅନୁକୂଳ ହେବନି, ଏହାଦ୍ଵାରା ପ୍ରଦୂଷଣ ବଢ଼ିବ। କିନ୍ତୁ ବଟଲିଂ ତୁଳନାରେ ଟେଟ୍ରା ପ୍ୟାକରେ ପ୍ୟାକେଜିଂ ଖର୍ଚ୍ଚ କମ୍ ରହିବ। ତେଣୁ ଏ ଫାଇଦା ସିଧା ଗ୍ରାହକଙ୍କ ପାଖକୁ ଯିବ ନା ସରକାରଙ୍କ ତହବିଲକୁ ଯିବ ତାକୁ ନେଇ ପ୍ରଶ୍ନ ଉଠିଛି। ତେବେ ନୂଆ ଅବକାରୀ ନୀତିରେ ସରକାର ଟେଟ୍ରା ପ୍ୟାକରେ ମଦବିକ୍ରିକୁ ନେଇ କି ସ୍ପଷ୍ଟତା ଆଣୁଛନ୍ତି ଏବେ ତା ଉପରେ ନଜର। ଅନ୍ୟପକ୍ଷରେ ରାଜ୍ୟରେ ପ୍ରତିବର୍ଷ କ୍ରମାଗତ ଭାବରେ ମଦ ବିକ୍ରି ବଢ଼ି ଚାଲିଛି। ୧୦ ମାସରେ ୬ ହଜାର ୫୬୯ କୋଟି ଟଙ୍କାର ମଦ ପିଇ ଦେଇଛନ୍ତି ରାଜ୍ୟବାସୀ। ୨୦୨୩-୨୪ରେ ମଦ ବିକ୍ରିରୁ ୭ ହଜାର ୨୧୬ କୋଟି ରାଜସ୍ୱ ଆଦାୟ ହୋଇଥିଲା। ୨୦୨୪-୨୫ରେ ୮ ହଜାର ୧୯୫ କୋଟିର ରାଜସ୍ୱ ଆଦାୟ ହୋଇଛି । ଯାହା ରାଜ୍ୟ ରାଜସ୍ଵକୁ ବଢ଼ାଇଛି। ଏନେଇ ଅବକାରୀ ମନ୍ତ୍ରୀ ବିଧାନସଭାରେ ଉତ୍ତର ରଖିଛନ୍ତି।