ନୀଳଗିରି ଅବକାରୀ ବିଭାଗର ବଡ଼ ସଫଳତା,
୧୪ ଲକ୍ଷରୁ ଉର୍ଦ୍ଧ୍ବ ଟଙ୍କାର ଧଳା ଜହର ଜବତ, ଜଣେ ଗିରଫ
ନୀଳଗିରି ,୫/୮(ଓଡ଼ିଶା ଆଦର୍ଶ):ବାଲେଶ୍ୱର ଜିଲ୍ଲା ନୀଳଗିରି ଅବକାରୀ ବିଭାଗ ପକ୍ଷରୁ ଜଣେ ଧଳା ଜହର ବା ବ୍ରାଉନସୁଗର ବେପାରୀକୁ ଗିରଫ କରିଥିବା ବେଳେ ବେପାରୀ ଠାରୁ ୧୪ଲକ୍ଷ ଟଙ୍କାର ବ୍ରାଉନସୁଗର ଜବତ କରିଛି । ନୀଳଗିରି ଅବକାରୀ ଥାନା ଇନ୍ସପେକ୍ଟର କେଶବ ଚନ୍ଦ୍ର ଦାସ ଏବଂ ଓଆଇସି ଜଗନ୍ନାଥ ବେହେରାଙ୍କ ମିଳିତ ତତ୍ତ୍ୱାବଧାନରେ ଏକ ସ୍ୱତନ୍ତ୍ର ଟିମ ସାଧା ପୋଷାକରେ ନୀଳଗିରି ଥାନା ଅଧୀନ ସନ୍ତରାଗଡ଼ିଆ ଠାରେ ପହଞ୍ଚିଥିଲା । ତେବେ ଅବକାରୀ କର୍ମଚାରୀମାନେ ଗରାଖ ସାଜି ଉକ୍ତ ଅଞ୍ଚଳର ଏକ ହୋଟେଲ ପାଖରେ ବସିଥିବା ଧଳା ଜହର ବେପାରୀ ଲୁଲୁ ଓରଫ ଜଗଦ୍ଦୀଶ ପାଣିଗ୍ରାହୀଙ୍କୁ ବ୍ରାଉନ ସୁଗର ମାଗିଥିଲେ । ବେପାରୀ ଜଣକ ଏହି ବ୍ରାଉନସୁଗର ଆଣିବାକୁ ଯାଇଥିବା ଦେଖି ତାକୁ ପଛ ପଟୁ ମାଡ଼ି ବସିଥିଲେ । ତେବେ ଏହି ବେପାରୀଙ୍କ ଠାରୁ ୧୪୦ଗ୍ରାମ ଓଜନର ବ୍ରାଉନସୁଗର ଜବତ ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ୧୪ଲକ୍ଷରୁ ଊର୍ଦ୍ଧ୍ୱ ଟଙ୍କା ହେବ ବୋଲି ଜଣାପଡିଛି । ଗିରଫ ଯୁବକ ହେଲେ ନୀଳଗିରି ଥାନା ସନ୍ତ୍ରଗଡିଆ ଅଞ୍ଚଳର ପର୍ଶୁରାମ ପାଣିଗ୍ରାହୀ ଙ୍କ ପୁଅ ଜଗଦୀଶ ପାଣିଗ୍ରାହୀ (୩୦) ।ଗିରଫ କରାଯିବା ପରେ ଉକ୍ତ ଅଭିଯୁକ୍ତକୁ ଅବକାରୀ ବିଭାଗ କେସ ୧୩୧/୨୫-୨୬ ଓ ୨୨୯/୨୫, ନମ୍ବର ମୂଳେ ବାଲେଶ୍ୱର କୋର୍ଟ ଚାଲାଣ କରାଯାଇଛି । ଏହି ଚଢ଼ାଉରେ କନଷ୍ଟେବଳ ସନ୍ତୋଷ ବେହେରା, ତପନ ମଲ୍ଲିକ , ନହନ ମୁର୍ମୁ ପ୍ରମୁଖ ସାମିଲ ଥିଲେ । ତେବେ ନୀଳଗିରି ଅବକାରୀ ବିଭାଗକୁ ଏକ ପ୍ରକାର ବଡ଼ ସଫଳତା ମିଳିଛି ବୋଲି ଚର୍ଚ୍ଚା ହେଉଛି।
Post a Comment